کراچی کے 10 مختلف مقامات پر مذہبی جماعت کا دھرنا اور احتجاج

کراچی کے 10 مختلف مقامات پر دھرنا اور احتجاج جاری ہے جب کہ کئی سڑکوں کو کنٹینرز لگا کر بند کردیا گیا ہے۔ 

اسلام آباد میں مذہبی جماعت کے دھرنے سے اظہار یکجہتی کے لئے کراچی کے مختلف علاقوں میں مذہبی جماعتوں کی جانب سے دھرنے اور احتجاج کا سلسلہ جاری رہے۔

نمائش چورنگی پر مذہبی جماعت کے دھرنے کو منی دھرنا قرار دیا جارہا ہے جہاں مظاہرین نے احتجاج کرتے ہوئے سڑک ٹریفک کی آمد و رفت کے لئے بند کردی۔ 

مذہبی جماعت کے کارکنان کی جانب سے ٹاور، حب ریور روڈ، الاصف اسکوائر، اورنگی ٹاؤن نمبر پانچ، لانڈھی 6، کورنگی ڈھائی نمبر، کورنگی نمبر 5 میں بھی احتجاج جاری ہے۔ 

دوسری جانب گورنر ہاؤس جانے والی سڑک کو کنٹینرز لگا کر بند کر دیا گیا ہے، اسی طرح تین ہٹی سے جہانگیر روڈ جانے اور آنے والی سڑک بھی بند ہے۔ 

انتظامیہ نے کسی بھی ناخوشگوار واقعے سے نمٹنے کے لئے نمائش چورنگی سے صدر جانے اور آنے والی سڑک کو بھی بند کردیا ہے۔