وزیراعظم نے نوازشریف کو قومی سلامتی کمیٹی کے اجلاس سے متعلق آگاہ کردیا

اسلام آباد: وزیراعظم شاہد خاقان عباسی نے میاں نوازشریف کو قومی سلامتی کمیٹی کے اجلاس سے متعلق آگاہ کردیا۔

سابق وزیراعظم میاں نوازشریف کے ممبئی حملوں سے متعلق حالیہ متنازع بیان پر ملک بھر کے سیاستدانوں نے شدید رد عمل کا اظہار کیا ہے جب کہ اس حوالے سے قومی سلامتی کمیٹی کا اجلاس بھی ہوا۔

اپنے بیان پر قائم ہوں چاہے جو کچھ بھی سہنا پڑے حق بات کروں گا، نواز شریف

میں نے جواب مانگا تھا میرے سوال کا جواب آنا چاہیے تھا،سوال پوچھنے والے کو غدار کہہ رہے ہیں، غدار اسے کہا جارہا ہے جس نے ایٹمی دھماکے کیے، سابق وزیراعظم

جیونیوز کے مطابق قومی سلامتی کمیٹی کے اجلاس کےبعد وزیراعظم شاہد خاقان عباسی مسلم لیگ (ن) کے قائد نوازشریف سے ملاقات کے لیے اسلام آباد میں چوہدری منیر کی رہائش گاہ پہنچے جہاں دونوں کے درمیان ملاقات ہوئی۔

ذرائع کے مطابق اجلاس میں نوازشریف کی صاحبزادی مریم نواز اور اہم پارٹی رہنما شریک تھے۔

ذرائع کا کہنا ہےکہ وزیراعظم اور نوازشریف کے درمیان مختصر ملاقات ہوئی جس میں وزیراعظم شاہد خاقان عباسی نے (ن) لیگ کے قائد کو قومی سلامتی کمیٹی کے اجلاس سے متعلق آگاہ کیا جب کہ اس دوران ان کے متنازع بیان پربات چیت کی گئی۔