پاکستانی ٹیم کی بولاوایو سے روانگی میں تاخیر کی وجہ سامنے آگئی

پاکستانی ٹیم جمعرات کی دوپہرکو پریکٹس کرے گی—اے ایف پی فائل فوٹو۔

زمبابوے کرکٹ نے تصدیق کی ہے کہ بورڈ مالی بحران کا شکار ہے یہی وجہ ہے کہ پاکستانی ٹیم کی بولاوایو سے روانگی میں تاخیر ہوئی ہے۔

بورڈ کا کہنا ہے کہ مالی بحران کی وجہ سے زمبابوے کرکٹ کھلاڑیوں اور اپنے ملازمین کو بھی بروقت ادائیگی نہیں کر پار ہی ہے۔

زمبابوے کی ٹیم پیر کو بولاوایو پہنچ گئی اور منگل کو پہلے پریکٹس سیشن میں شرکت کی۔

پاکستانی ٹیم جمعرات کی دوپہرکو پریکٹس کرے گی، ہرارے سے بولاوایو نے پرواز ایک گھنٹے کی ہے، پاکستانی ٹیم جمعرات کی صبح روانہ ہوگی۔

منتظمین نے تصدیق کی ہے کہ ایڈوانس میں ادائیگی نہ ہونے کی وجہ سے ہوٹل نے بکنگ منسوخ کردی تھی حالانکہ ہوٹل میں کمرے دستیاب تھے۔

پاکستانی کرکٹ ٹیم نے منگل کو زمبابوے کے شہر ہرارے میں پانچ میچوں کی ون ڈے سیریز کے لئے پریکٹس سیشن میں حصہ لیا۔

پاکستان کرکٹ ٹیم انتظامیہ کا کہنا ہے کہ بولاوایو میں ہوٹل بکنگ کا تنازع حل ہوگیا ہے اور پاکستانی ٹیم اب جمعرات کو ہرارے سے بولاوایو جائے گی جبکہ جمعے کو پہلا ون ڈے انٹرنیشنل میچ کھیلا جائے گا۔

ذرائع کا کہنا ہے کہ عین موقع پر بولاوائیو سے اطلاع آئی کہ ادائیگی نہ ہونے کی وجہ سے ہوٹل نے بکنگ منسوخ کردی تاہم زمبابوے کرکٹ نے منگل کو مسئلہ حل کر لیا۔

پاکستانی کرکٹ ٹیم کا سامان سڑک کے راستے بولا وایو روانہ کردیا گیا تھا لیکن سامان واپس آگیا جس کے بعد کھلاڑیوں نے پریکٹس کی۔

پاکستان ٹیم کے سیکیورٹی آفیسر کرنل (ر) اعظم اور انالسٹ طلحہٰ بھی سڑک کے راستے بولا وایو روانہ ہوگئے تھے، دونوں بدستور بولاوایو میں ہیں۔

پاکستان ٹیم کو جوائن کرنے کے لیے بابر اعظم، امام الحق، یاسر شاہ اور جنید خان ہرارے پہنچ گئے ہیں جبکہ ٹی ٹوئنٹی سیریز کے بعد شاہین شاہ آفریدی، حسین طلعت اور صاحبزادہ فرحان وطن واپس آگئے ہیں۔

پاکستان اور زمبابوے کے درمیان پانچ ون ڈے میچز 13، 16، 18، 20 اور 22 جولائی کو کھیلے جانے ہیں۔

پاکستانی ٹیم کا کہنا ہے کہ ہوٹل بکنگ کا معاملہ خوش اسلوبی سے حل ہونے کے بعد ٹیم اب جمعرات کو جہاز کے ذریعے روانہ ہوگی۔

مزید خبریں :