27 اکتوبر ، 2018 
تھر میں غربت سے تنگ بیوہ خاتون کی بچی سمیت خود کشی
27 اکتوبر ، 2018
صحرائے تھر میں بھوک اور افلاس سے تنگ آکر ایک بیوہ خاتون نے اپنی تین سالہ بچی کے ساتھ خود کشی کر لی۔
خود کشی کرنے والی عورت کا شوہر ایک سال قبل فوت ہو گیا تھا جس کے بعد اس خاتون اور اس کی بچی کو پالنے کا بوجھ اس کے غربت کے مارے سسرال والوں کے لیے قابل برداشت نہیں رہا تھا لہذا سسرالی اسے بچی سمیت والدین کے گھر چھوڑ گئے تھے۔
پولیس کے مطابق واقعہ چیلہار کے گاؤں فلڑہار میں پیش آیا جہاں بھوک و تنگدستی کے سبب 22 سالہ شریمتی نپو نے اپنی تین سالہ بچی کے ساتھ کنویں میں چھلانگ لگا کر خودکشی کر لی۔
پولیس کے مطابق متوفیہ شریمتی نپو اور اس کی بچی کی لاشیں کنویں سے نکال کر سول اسپتال مٹھی منتقل کر دی گئی ہیں جبکہ واقعہ سے علاقہ کی فضا سوگوار ہو گئی ہے۔
اطلاعات کے مطابق تھر میں سال رواں تاحال 80 سے زائد افراد خودکشیاں کر چکے ہیں جن میں زیادہ تر تعداد خواتین کی ہے اور ان کی خودکشیوں کی وجوہات غربت و تنگدستی بتایا جاتا ہے۔
