آرمی ایکٹ میں ترمیم کا بِل کل قومی اسمبلی میں پیش کیا جائے گا

وزیراعظم عمران خان کل قومی اسمبلی کے اجلاس میں پیش ہوں گے اور کل ہی وفاقی کابینہ سے منظور شدہ آرمی ایکٹ میں ترمیم کا بل قومی اسمبلی میں پیش کیا جائے گا۔

آرمی چیف کی مدت ملازمت میں توسیع کا بل کیا ہے؟ کاپی جیونیوز کو موصول

آرمی ترمیمی ایکٹ بل میں ایک نئے چیپٹرکا اضافہ کیا گیا ہے جسے آرمی چیف اور چیئرمین جوائنٹ چیفس آف اسٹاف کمیٹی کی تعیناتی کا نام دیا گیا ہے۔

تحریک انصاف کے رہنما ملک عامر ڈوگر کا کہنا ہے کہ سروسز چیفس کی مدت ملازمت میں توسیع کا ایکٹ کل دونوں ایوانوں سے منظور کرانے کی تیاری کررہے ہیں۔

انہوں نے دعویٰ کیا کہ نمازِ جمعہ سے پہلے آرمی ایکٹ قومی اسمبلی میں پیش اور منظور ہوگا، جمعہ کے بعد سینٹ اجلاس میں آرمی ایکٹ پیش اور منظور ہوگا۔

خیال کیا جارہا ہے کہ حکومت یہ بل قومی اسمبلی سے باآسانی منظور کرانے میں کامیاب ہوجائے گی کیوں کہ  سب سے بڑی اپوزیشن جماعت پاکستان مسلم لیگ (ن) نے آرمی چیف کی مدت ملازمت سے متعلق آرمی ایکٹ میں ترامیم کی غیر مشروط حمایت کا فیصلہ کر لیا ہے۔

ذرائع کے مطابق مسلم لیگ ن کی قیادت کا مؤقف ہے کہ وہ آرمی چیف کے عہدے کو متنازع نہیں بنانا چاہتی اس لیے وہ آرمی ایکٹ میں ترامیم کی حمایت کریں گے۔

ذرائع کا مزید کہنا ہے کہ مسلم لیگ ن ایکٹ کی غیر مشروط حمایت کرے گی۔

حکومت نے آرمی چیف کی مدت ملازمت پر قانون سازی کے لیے مسلم لیگ (ن) سے حمایت مانگی تھی جو اسے حاصل ہوچکی ہے۔

 آرمی ایکٹ ترمیمی بل 2020 

خیال رہےکہ گذشتہ روز وزیراعظم عمران خان کی زیر صدارت وفاقی کابینہ کے ہنگامی اجلاس میں آرمی ایکٹ میں ترامیم کی منظوری دی گئی تھی۔

 وفاقی کابینہ نے سپریم کورٹ کے احکامات کی روشنی میں آرمی ایکٹ ترمیمی بل 2020 کی منظوری دی  جس میں آرمی چیف کی مدت ملازمت اور توسیع کا طریقہ کار وضع کیاگیا ہے۔

آرمی ایکٹ  ترمیمی بل میں ایک نئے چیپٹرکا اضافہ کیا گیا ہے، اس نئے چیپٹر کو آرمی چیف اور چیئرمین جوائنٹ چیفس آف اسٹاف کمیٹی کی تعیناتی کا نام دیا گیا ہے۔

اس بل میں آرمی چیف کی تعیناتی کی مدت تین سال مقررکی گئی ہے جب کہ آرمی چیف کی مدت ملازمت پوری ہونے پر انہیں تین سال کی توسیع دی جا سکے گی۔

ترمیمی بل کے مطابق وزیراعظم کی ایڈوائس پر قومی مفاد اور ہنگامی صورتحال کا تعین کیا جائے گا، آرمی چیف کی نئی تعیناتی یا توسیع وزیراعظم کی مشاورت پر صدر کریں گے۔

'دوبارہ تعیناتی یا توسیع عدالت میں چیلنج نہیں کی جا سکے گی'

ترمیمی بل کے تحت آرمی چیف کی تعیناتی، دوبارہ تعیناتی یا توسیع عدالت میں چیلنج نہیں کی جا سکے گی اور نہ ہی ریٹائر ہونے کی عمر کا اطلاق آرمی چیف پر ہوگا۔

علاوہ ازیں ترمیمی بل کے مطابق پاک فوج، ائیر فورس یا نیوی سے تین سال کے لیے چیئرمین جوائنٹ چیفس آف اسٹاف کا تعین کیا جائے گا جن کی تعیناتی وزیراعظم کی مشاورت پر صدر کریں گے۔

سپریم کورٹ نے آرمی چیف کی مدت ملازمت میں 6 ماہ کی مشروط توسیع دے دی

آرمی چیف کی موجودہ تقرری 6 ماہ کیلئے ہوگی، تحمل کا مظاہرہ کرتے ہوئے معاملہ پارلیمنٹ پر چھوڑتے ہیں، جنرل باجوہ نئی قانون سازی تک فرائض انجام دیں گے، سپریم کورٹ

ترمیمی بل کے مطابق اگر چیئرمین جوائنٹ چیفس آف اسٹاف کمیٹی پاک فوج سے ہوا تو بھی اسی قانون کا اطلاق ہو گا، ساتھ ہی چیئرمین جوائنٹ چیفس آف اسٹاف کمیٹی کو  بھی تین سال کی توسیع دی جاسکے گی۔

خیال رہے کہ آرمی چیف جنرل قمر جاوید باجوہ کی مدت ملازمت 28 نومبر 2019 کی رات 12 بجے مکمل ہورہی تھی اور وفاقی حکومت نے 19 اگست کو جاری نوٹیفکیشن کے ذریعے  انہیں3 سال کی نئی مدت کے لیے آرمی چیف مقرر کردیا تھا جسے سپریم کورٹ میں چیلنج کردیا گیا تھا۔

گذشتہ سال 28 نومبر 2019 کو آرمی چیف کی مدت ملازمت کیس کی سماعت  کے دوران سپریم کورٹ نے آرمی چیف جنرل قمر جاوید باجوہ کی مدت ملازمت میں 6 ماہ کی مشروط توسیع کرتے ہوئے پارلیمنٹ کو اس حوالے سے قانون سازی کرنے کا حکم دیا تھا۔