سندھ حکومت کا بھی اسکول فیسوں میں ریلیف کا اعلان

پنجاب کے بعد محکمہ تعلیم سندھ نے بھی  اسکول فیسوں میں ریلیف کا اعلان کرتے ہوئے نجی اسکولوں کو اپریل اور مئی کی فیس میں 20 فیصد رعایت دینے کا حکم دے دیا۔

محکمہ تعلیم سندھ نے عوام  کے لیے اسکولوں کی فیس میں ریلیف کا فیصلہ کرتے ہوئے  نجی اسکولوں کو ہدایت کی ہے کہ اپریل اور مئی کی فیس میں 20 فیصد رعایت دی جائے۔

محکمہ تعلیم نے تمام اسکولوں کو فیصلے پر عمل درآمد کی ہدایت کرتے ہوئے کہا ہے کہ خلاف ورزی کرنے والے اسکولوں کے خلاف کارروائی کی جائے گی۔

خیال رہے کہ سندھ میں کورونا وائرس کے باعث تمام اسکول اور تعلیمی ادارے جون تک بند ہیں جب کہ لاک ڈاؤن کے باعث کاروباری سرگرمیاں بھی منجمد ہیں جس کے  باعث شہریوں کی معاشی مشکلات میں اضافہ ہوگیا ہے۔

اس سے قبل پنجاب حکومت نے بھی چھٹیوں کے دوران نجی اسکولوں کو 20 فیصد رعایت دینے کا حکم دیا تھا۔