26 اپریل ، 2020 
کراچی: سرجانی ٹاؤن میں پانی کے گڑھے میں ڈوب کر پانچ بچے جاں بحق
26 اپریل ، 2020
کراچی کے علاقے سرجانی ٹاؤن میں پانی کے گڑھے میں نہاتے ہوئے ڈوب کر دو کمسن بھائیوں سمیت پانچ بچے جاں بحق ہو گئے۔
پولیس ذرائع کے مطابق افسوسناک واقعہ سرجانی ٹاؤن کے سیکٹر سیون اے میں پیش آیا۔
پولیس کی ابتدائی تفتیش کے مطابق بچے گڑھے میں جمع ہونے والے پانی میں نہانے کے لیے اترے تھے کہ حادثے کا شکار ہوگئے۔
حادثے میں جاں بحق ہونے والے بچوں کی لاشیں قانونی کارروائی کے لیے عباسی اسپتال منتقل کردی گئی ہیں۔
جاں بحق بچوں کی شناخت 9 سالہ اسید احمد، اس کے بھائی 13 سالہ مقصود احمد، 14 سالہ زبیر، 13 سالہ ارمان طاہر اور 11 سالہ عبداللہ کے ناموں سے ہوئی ہے۔
ڈی ایس پی ایڈمن ویسٹ زون ناصر بخاری کے مطابق واقعہ حادثاتی طور پر پیش آیا، ایک بچہ بچ گیا تھا جس کے بیان سے صحیح صورتحال سامنے آئی۔
