12 مئی ، 2020 
افریقی ملک گھانا سے پاکستانی شہری کراچی پہنچ گئے
12 مئی ، 2020
کراچی: امریکا، دبئی اور دیگر ممالک کے بعد افریقی ملک گھانا سے بھی خصوصی پرواز کے ذریعے 15 پاکستانی وطن واپس پہنچ گئے۔
سول ایوی ایشن ذرائع کے مطابق وطن واپس آنے والے مسافر کراچی ائیرپورٹ پہنچے جہاں ان کی جناح ٹرمینل پر کورونا وائرس کی اسکریننگ کی گئی اس کے بعد سول ایوی ایشن، محکمہ صحت سندھ اور دیگر اداروں نےطبی معائنہ کیا جس کے بعد مسافروں کو کلیئر قرار دیا۔
کورونا احتیاطی تدابیر کے باعث گھانا سے آئے تمام مسافروں کو 48 گھنٹوں کی آئسولیشن کے لیے ائیرپورٹ پر واقع ایک نجی ہوٹل میں منتقل کیا گیا ہے۔
خیال رہے کہ کورونا وائرس کے باعث دنیا بھر میں لاک ڈاؤن کی وجہ سے مختلف ممالک میں ہزاروں پاکستانی پھنسے ہوئے ہیں جن کی واپسی کے لیے حکومت کی جانب سے وقفے وقفے سے خصوصی پروازیں چلائی جارہی ہیں۔
