18 نومبر ، 2020 
وزیراعظم عمران خان کل اپنے پہلے دورہ افغانستان پر روانہ ہوں گے
18 نومبر ، 2020
وزیراعظم عمران خان کل ایک روزہ دورہ پر افغانستان جائیں گے جس کی تصدیق دفتر خارجہ کی جانب سے بھی کردی گئی ہے۔
ترجمان دفترخارجہ کے مطابق وزیراعظم عمران خان کو دورے کی دعوت افغان صدر اشرف غنی نے دی ہے۔ وزیراعظم کا عہدہ سنبھالنے کے بعد عمران خان کا یہ پہلا دورہ افغانستان ہے۔
ترجمان کے مطابق وزیراعظم کا دورہ افغانستان انتہائی اہم نوعیت کا ہے، وزیراعظم دورہ افغانستان میں افغان امن عمل، دوطرفہ تعلقات پر بات کریں گے۔
اس کے علاوہ وزیراعظم تجارت، راہدری، دوطرفہ معاشی تعاون پر بھی افغان حکام سے مذاکرات کریں گے۔
ترجمان دفتر خارجہ کے مطابق وزیرخارجہ شاہ محمود قریشی، مشیرتجارت عبدالرزاق داؤد بھی وفد کا حصہ ہوں گے۔
اس کے علاوہ سیکرٹری خارجہ اور دیگر سینیئر حکام بھی وزیراعظم عمران خان کے وفد میں شامل ہوں گے۔
