26 جنوری ، 2021 
’رواں سال کے آخر تک پورے پنجاب میں ہیلتھ کارڈ کی سہولت میسر ہو گی’
26 جنوری ، 2021
لاہور: وزیر صحت پنجاب ڈاکٹر یاسمین راشد کا کہنا ہے کہ پنجاب کابینہ کے اجلاس میں صحت ہیلتھ کارڈ کی منظوری دے دی گئی ہے اور رواں سال کے آخر تک پورے پنجاب میں ہیلتھ کارڈ کی سہولت میسر ہو گی۔
لاہور کے مقامی ہوٹل میں ٹائیفائیڈ ویکسین کی افتتاحی تقریب سے خطاب کرتے ہوئے ڈاکٹر یاسمین راشد نے کہا کہ 2 کروڑ 93 لاکھ خاندانوں میں صحت کارڈ کی فراہمی یقینی بنائی جا رہی ہے، 7 لاکھ روپے مالیت کا صحت کارڈ ملک بھر کے نجی اسپتالوں میں بھی استعمال ہوسکے گا۔
وزیر صحت پنجاب کے مطابق پاکستان میں سالانہ تقریباً 2 لاکھ بچے پیٹ کی بیماریوں سے انتقال کر جاتے ہیں، پنجاب میں مرحلہ وار ویکسین کی مہم شروع کی جارہی ہے جس میں 9 ماہ سے لے کر 15 برس کی عمر کے افراد کو ویکسین دی جائے گی۔
دوسری جانب صوبائی وزیر تعلیم مراد راس کا کہنا تھا والدین کو چاہیے کہ مہم کے دوران اسکولوں میں اپنے بچوں کی حاضری یقینی بنائیں ، ٹائیفائیڈ ویکسین مہم کو کامیابی سے ہمکنار کروانا ہم سب کی ذمہ داری ہے۔
