برائیڈل شوٹ کی تصویر سامنے آنے کے بعد عالیہ بھٹ کی شادی کے چرچے

اداکار ورون دھون اور نتاشہ دلال کی شادی کے بعد اب بالی وڈ اداکارہ عالیہ بھٹ اور رنبیر کپورکی شادی کے چرچے ہیں۔

اداکارہ عالیہ بھٹ کی برائیڈل شوٹ  کی تصاویر تیزی سے سوشل میڈیا پر وائرل ہورہی ہیں جس میں انہوں نے ہاتھوں میں مہندی بھی لگارکھی ہے۔

پنک ولا کی رپورٹ کے مطابق ورون دھون کی اہلیہ نتاشا دلال کو شادی میں مہندی لگانے والی آرٹسٹ وینا ناگدا کی جانب سے سوشل میڈیا پلیٹ فارم انسٹاگرام پر عالیہ بھٹ کے ہمراہ ایک تصویر شیئر کی گئی ہے۔

تصویر میں اداکارہ کو برائیڈل لہنگا پہنے اور مہندی لگے ہاتھوں میں آرٹسٹ کے ہمراہ کھڑے دیکھا جاسکتا ہے،کہا جارہا ہے کہ تصویر  کسی اشتہار کی سیٹ کی شوٹنگ کے دوران لی گئی ہے۔

بھارتی میڈیا رپورٹس کے مطابق وینا کی جانب سے اس پوسٹ کا کیپشن بھی درج کیا گیا تھا کہ ’عالیہ اب تک کی سب سے خوبصورت دلہن ہوں گی‘، تاہم بعد میں آرٹسٹ نے پوسٹ ڈیلیٹ کردی۔

اس پوسٹ کے بعد مداحوں کی جانب سے قیاس آرائیاں کی جارہی ہیں کہ عالیہ بھٹ جلد ہی اداکار رنبیر کپور کے ساتھ شادی کے بندھن میں بندھنے جارہی ہیں۔

خیال رہے کہ گزشتہ دنوں اداکار رنبیر کپور نے بھی ایک انٹرویو میں کہا تھا کہ اگر کورونا وبا نہیں آتی تو وہ عالیہ کے ساتھ شادی کر چکے ہوتے۔