ٹرینوں میں 70 فیصد بکنگ کا حکم، بغیر ماسک سفر کرنیوالوں پر جرمانہ ہوگا
25 مارچ ، 2021
لاہور: ریلوے حکام نے کورونا ایس او پیز کے تحت ٹرینوں میں صرف 70 فیصد بکنگ کے احکامات دے دیے۔
جیونیوز کے مطابق ملک میں کورونا کی تیسری لہر میں تیزی کے بعد این سی او سی کے فیصلے کے تحت ٹرینیں 70 فیصد مسافروں کے ساتھ چلائی جائیں گی۔
اس سلسلے میں ریلوے حکام نے ہدایات جاری کی ہیں کہ ٹرینوں کی بکنگ 70 فیصد سے زائد نہیں کی جائے گی، ریلوے اسٹیشنوں اور ٹرینوں میں مسافروں کو احتیاطی تدابیراپنانے کی ہدایات دی گئی ہیں۔
حکام کا کہنا ہےکہ ٹرین میں بغیر ماسک سفر کرنے والوں کو جرمانہ کیا جائے گا۔
واضح رہے کہ کورونا کیسز میں اضافے کے بعد این سی او سی نے ملک بھر میں ایک بار پھر کئی پابندیوں کا نفاذ کیا ہے اور کاروبار بھی رات 8 بجے بند کرنے کے احکامات دیے گئے ہیں۔
