کراچی… ڈیفنڈر مصباح الحسن کی عمدہ کارکردگی کی بدولت این بی پی نے پریمیئر لیگ فٹ بال کے میچ میں زرعی ترقیاتی بینک کو ایک صفر کی شکست دیدی۔ جناح فٹ بال اسٹیڈیم اسلام آباد میں زرعی ترقیاتی بنک لمٹیڈ (زیڈ ٹی بی ایل) اور نیشنل بنک آف پاکستان (این بی پی) کے درمیان کھیلا گیا میچ کافی دلچسپ رہا جس میں این بی پی نے ایک صفر سے فتح حاصل کی۔ میچ کاواحد گول ڈیفنڈر مصباح الحسن نے میچ کے 87 ویں منٹ میں کیا۔ پی اے ایف کمپلکس گراؤنڈ پشاور میں پاکستان ائیر فورس (پی اے ایف) اور کراچی الیکٹرک سپلائی کمپنی (کے ای ایس سی) کے درمیان کھیلا گیا جس میں پی اے ایف نے ایک صفر سے فتح حاصل کی۔ میچ کا واحد گول اسٹرائیکر مجاہد نے 15 ویں منٹ میں کیا۔ ریلوے فٹ بال اسٹیڈیم لاہور میں واٹر اینڈ پاور ڈوپلمنٹ اتھارٹی (واپڈا) اور نیوی کے درمیان کھیلا گیا میچ موسلا دھار بارش اور کم روشنی کی وجہ سے نہ ہوسکا۔ اب یہ میچ منگل کو ہوگا۔ اسی طرح لاہور میں ووہیب ایف سی لاہور اور افغان ایف سی کے درمیان کھیلا گیا میچ بھی موخر کیا گیا جو منگل کو ہوگا۔