21 دسمبر ، 2021 
نوابشاہ میں دوسرے روز بھی نیشنل ہائی وے پر دھرنا جاری، گاڑیوں کی لمبی قطاریں لگ گئیں
21 دسمبر ، 2021
نوابشاہ کے علاقے قاضی احمد میں زرعی زمینوں پربااثر مسلح افراد کے مبینہ قبضے کے خلاف متاثرہ افراد کا دوسرے روز بھی قومی شاہراہ پر دھرنا جاری ہے۔
24 گھنٹے سے زائد دھرنے کے باعث ٹریفک کی روانی معطل اورشاہراہ کے دونوں جانب گاڑیوں کی لمبی قطاریں لگ گئیں۔
مال بردارگاڑیوں میں موجود سبزیاں، پھل اورگوشت خراب ہونے کا خدشہ ہے۔ مظاہرین نے زمین سے قبضہ ختم کیے جانے تک احتجاج جاری رکھنے کا اعلان کیا ہے۔
اُدھر موٹروے پولیس کا کہنا ہے کہ دھرنے کے باعث ٹریفک کو انڈس اور مہران ہائی وے کی سمت موڑدیا گیا ہے۔
دوسری جانب وزیراعظم عمران خان کے معاون خصوصی ارباب غلام رحیم کا کہنا ہے کہ پیپلزپارٹی، زرداری قبیلے اورآصف زرداری کے لوگوں نے زمینوں پر قبضہ کررکھا ہے، صوبائی حکومت نوٹس نہیں لے رہی۔
