20 جنوری ، 2022 
سرجانی ٹاؤن سے لاپتا 4 سالہ بچے کی لاش 8 روز بعد نالے سے مل گئی
20 جنوری ، 2022
کراچی: سرجانی ٹاؤن سے 8 روز قبل لاپتا 4 سالہ بچے کی لاش نالے سے مل گئی۔
پولیس کے مطابق سرجانی ٹاؤن کے رہائشی خاندان کا چار سالہ حسبان احمد 12 جنوری کی رات ساڑھے 10 بجے گھر کے باہر سے لاپتا ہوگیا تھا، اہل خانہ نے پولیس کو اطلاع دی اور خاندان نے اپنے طور پر بھی بچے کی تلاش میں ہر ممکن اقدام کیا، بچے کو ہر جگہ تلاش کیا گیا اور سوشل میڈیا پر بھی اس حوالے سے اطلاع دی گئی۔
پولیس کا بتانا ہےکہ بچے کی لاش 8 روز بعد جمعرات کی صبح سرجانی ٹاؤن میں سیف المری گوٹھ کے قریب نالے سے ملی جو پانی میں تیر رہی تھی۔
ایدھی فاؤنڈیشن کے مطابق لاش عباسی شہید اسپتال منتقل کی گئی ہے اور بچے کی موت کی وجہ فوری طور پر سامنے نہیں آ سکی۔
پولیس کے مطابق لاش کا پوسٹ مارٹم کرنے کے بعد موت کی وجہ کا تعین ہوسکے گا البتہ ڈاکٹرز کا کہنا ہےکہ بچے کے جسم پر تشدد کا کوئی نشان نہیں۔
