24 اپریل ، 2022 
سینیئر بیوروکریٹ احد چیمہ کا ملازمت سے مستعفی ہونے پر غور
24 اپریل ، 2022
سینیئر بیوروکریٹ گریڈ بیس کے پی اے ایس افسر احد چیمہ ملازمت سے استعفیٰ دینے پر غور کر رہے ہیں۔
ذرائع کے مطابق احد چیمہ استعفے پر غور گزشتہ 3 سالوں میں روا رکھے گئے سلوک کے باعث کر رہے ہیں۔
ذرائع کا کہنا ہےکہ احد چیمہ کو متعدد مقدمات میں گرفتار کیا گیا لیکن کچھ ثابت نہ ہو سکا، احد چیمہ کے خاندان کی خواتین کو بھی ہراساں کیا گیا۔
احد چیمہ مسلم لیگ ن کے گزشتہ دور میں میٹروبس اور اورنج ٹرین منصوبوں کے روح رواں رہے اور پنجاب میں نجی بجلی گھر لگانے کے منصوبو ں میں بھی احد چیمہ کا کردار رہا۔
خیال رہےکہ نیب نے 21 فروری 2018 کو کارروائی کرتے ہوئے احد چیمہ کو گرفتار کیا تھا، ان کیخلاف آمدن سے زائد اثاثے، آشیانہ اقبال ہاؤسنگ سوسائٹی اور ایل ڈی اے سٹی کیس کی تحقیقات کی جارہی تھیں تاہم کوئی ثبوت نہ ملنے کے بعد وہ گذشتہ سال اپریل میں لاہور ہائی کورٹ سے ضمانت ملنے کے بعد رہا ہوگئے۔
احد چیمہ کی گرفتاری کے بعد اسٹیبلشمنٹ ڈویژن نے انہیں معطل کر دیا تھا، بعد ازاں اسٹیبلشمنٹ ڈویژن نے انہیں انکوائری میں لگائے گئے الزامات سے بری کرکے گریڈ 20میں ترقی دے دی تھی۔
