21 مئی ، 2022 
اسلام آباد ہائیکورٹ کا شیریں مزاری کو آج رات ساڑھے 11 بجے پیش کرنےکا حکم
21 مئی ، 2022
سابق وفاقی وزیر و تحریک انصاف کی رہنما شیریں مزاری کی گرفتاری کے خلاف درخواست پر اسلام آباد ہائیکورٹ نے حکم نامہ جاری کردیا۔
اسلام آبادہائیکورٹ کےچیف جسٹس نے شیریں مزاری کی صاحبزادی ایمان مزاری کی درخواست پرحکم نامہ جاری کیا ہے۔
عدالت عالیہ نے حکم دیا ہےکہ سیکرٹری داخلہ یقینی بنائیں کہ شیریں مزاری کو آج رات ساڑھے 11 بجے پیش کیا جائے۔
حکم نامے میں سیکرٹری داخلہ، آئی جی اسلام آباد اور ڈپٹی کمشنر اسلام آباد کو ذاتی حیثیت میں پیش ہونےکا حکم دیا گیا ہے۔
عدالت کا کہنا ہے کہ پیش ہو کر بتائیں بنیادی حقوق کی خلاف ورزی کیوں کی گئی؟
اس حوالے سے اٹارنی جنرل اور ایڈووکیٹ جنرل اسلام آباد کو بھی نوٹس جاری کر دیےگئے ہیں۔
خیال رہے کہ شیریں مزاری کی گرفتاری کے خلاف اسلام آباد ہائیکورٹ میں ایمان مزاری کی جانب سے درخواست دائر کی گئی تھی۔
درخواست کے متن کے مطابق میری والدہ قانون نافذ کرنے والے اداروں کی جانب سے انسانی حقوق خلاف ورزیوں کی ناقد ہیں، دن کے اجالے میں والدہ کو اٹھایا گیا اور فیملی ممبرز کو اس متعلق کوئی معلومات بھی فراہم نہیں کی جارہیں، پٹیشنر کی والدہ کو وفاقی دارالحکومت سے اٹھایا گیا اور قانونی تقاضے بھی پورے نہیں کیے گئے۔
ذرائع کے مطابق اسلام آباد ہائیکورٹ کی انسٹیٹیوشن برانچ کاعملہ چھٹی کے بعددوبارہ ہائیکورٹ پہنچا تھا۔
خیال رہے کہ اینٹی کرپشن پنجاب کی ٹیم نے سابق وفاقی وزیر کو کوہسار تھانے کی حدود سے گرفتار کیا۔
