23 جون ، 2022 
ایم کیو ایم رہنما بابر غوری طویل جلا وطنی کے بعد آج کراچی پہنچیں گے
23 جون ، 2022
متحدہ قومی موومنٹ کے رہنما اور سابق وفاقی وزیر پورٹ اینڈ شپنگ بابر خان غوری کی طویل جلاوطنی کے بعد جمعرات کی شام امریکا سے وطن واپسی کا پروگرام ہے۔
نمائندہ جیو نیوز سے فون پر بات چیت کرتے ہوئے بابر خان غوری نے بتایا کہ وہ دو ہفتے قبل امریکا سے دبئی پہنچے تھے۔ جہاں قیام کے دوران انہوں نے اپنے خلاف کراچی میں درج دو مقدمات میں عدالت سے ضمانت قبل از گرفتاری حاصل کرلی۔
ان کا کہنا تھا کہ وہ اپنی اہلیہ بینا غوری کے ہمراہ امارات ائیرلائن کی پرواز ای کے 602 کے ذریعے جمعرات کی شام 6 بجے دبئی سے کراچی پہنچیں گے۔
ذرائع کے مطابق ایف آئی اے میں بابر غوری کے خلاف منی لانڈرنگ کا کیس بھی درج ہے۔
واضح رہے سابق وفاقی وزیر برائے پورٹ اینڈ شپنگ بابر غوری 2015 سے امریکا کے شہر ہیوسٹن میں مقیم ہیں۔ وہ سابق صدر جنرل پرویز مشرف کے دور میں ان کے انتہائی قریب پاکستان کے بااثر سیاست دانوں میں شامل رہے۔
