16 جولائی ، 2022 
پنجاب ضمنی انتخابات، 40 لاکھ ووٹوں کا پروپیگنڈا مکمل جھوٹ ہے: الیکشن کمیشن
16 جولائی ، 2022
ترجمان الیکشن کمیشن ہارون شنواری کا کہنا ہے کہ پنجاب کے ضمنی انتخابات میں 40 لاکھ ووٹوں کا پروپیگنڈا مکمل جھوٹ پر مبنی ہے۔
ہارون شنواری کے مطابق یہ بہتان تراشی عوام کو گمراہ کرنے کی گھٹیا اور ناکام کوشش ہے، 40 لاکھ نمبر کا تعلق نہ نئی فہرست سے ہے نہ ہی پرانی انتخابی فہرست سے ہے۔
ترجمان کا کہنا ہے کہ عوام جان لیں کہ پنجاب کے ضمنی انتخابات پرانی انتخابی فہرستوں پر ہو رہے ہیں، 25 مئی کو انتخابی شیڈول کے اعلان کے بعد انتخابی فہرستوں میں تبدیلی ممکن نہیں ہے۔
صوبائی الیکشن کمشنر پنجاب نے بھی پی ٹی آئی سربراہ کے بیانات اور الزامات کی تردید کرتے ہوئے انہیں بے بنیاد قرار دیا۔
انہوں نے کہا کہ انہیں فہم نہیں ووٹر لسٹ کے حوالے سےکہی گئی بات کا سیاق و سباق کیاہے، ووٹر لسٹ میں سے کوئی ووٹ ادھر سے ادھر نہیں ہوئے۔
دوسری جانب پنجاب کے 20 حلقوں پر ضمنی انتخاب کے لیے الیکشن کمیشن نے انتظامات مکمل کر لیے ہیں، پولنگ کے سامان کی ترسیل آج مکمل کی جائے گی۔
