26 جولائی ، 2022 
پاکستان
گرین لائن بی آر ٹی ایس کا آپریشن مکمل طور پر بحال کر دیا گیا ہے: ترجمان/ فوٹو: فائل
2 دن کی بندش کے بعد گرین لائن بس سروس بحال کردی گئی
26 جولائی ، 2022
کراچی میں 2 دن کی بندش کے بعد گرین لائن بس سروس بحال کردی گئی ۔
گرین لائن بس ریپڈ ٹرانزٹ سسٹم (بی آر ٹی ایس) کے ترجمان کے مطابق گرین لائن بی آر ٹی ایس کا آپریشن مکمل طور پر بحال کر دیا گیا ہے، بحالی کے عمل میں سامان کے ساتھ ساتھ مسافروں کی حفاظت کو بھی یقینی بنایا گیا ہے۔
خیال رہے کہ اتوار کے روز شدید بارش کے باعث گرین لائن بس سروس کے بیشتر اسٹیشن اور مختلف مقامات پر گرین لائن ٹریک زیر آب آ جانے کے بعد بس سروس اتوار کے روز قبل از وقت بند کر دی گئی تھی جبکہ پیرکے روز پورا دن ہی گرین لائن سروس مسافروں کے لیے بند رہی۔
ترجمان گرین لائن بی آر ٹی ایس کے مطابق سروس کی بحالی کا کام آج صبح شروع کیا گیا، اب گرین لائن بس سروس مکمل طور پر فعال اور محفوظ ہے۔
