16 اکتوبر ، 2022 
ہنٹرز ہم تھے لیکن ہمارا ہی شکار کرلیا گیا: ٹیم کے لیگ سے باہر ہونے پر سیمی کا ردعمل
16 اکتوبر ، 2022
پاکستان جونیئر لیگ کی ٹیم حیدر آباد ہنٹرز کے مینٹور اور سابق ویسٹ انڈین کپتان ڈیرن سیمی کا کہنا ہے کہ پی جے ایل میں حیدر آباد ہنٹرز کی ٹیم شکار ہو گئی ہے حالانکہ ہنٹرز ہم تھے لیکن ہمارا ہی شکار کر لیا گیا۔
پاکستان جونیئر لیگ میں حیدر آباد ہنٹرز کوئی میچ نہ جیت سکی اور پوائنٹس ٹیبل پر آخری نمبر پر رہی۔
اس حوالے سے گفتگو کرتے ہوئے مینٹور حیدر آباد ہنٹرز ڈیرن سیمی نے کہا کہ کوئی میچ نہ جیت کر ایونٹ سے باہر ہونا مایوس کن ہے، میں نے مینٹور کی حیثیت بہت کچھ بتانا چاہا جو کہ میرا کام بھی تھا لیکن ضرورت پلان پر عمل کرنے کی ہے، پلان پر عمل کی کمی تھی جو ٹیم کے لیگ سے باہر ہونے کا سبب بنی۔
ڈیرن سیمی کے مطابق ہم ایک بھی میچ نہیں جیتے، کھلاڑیوں نے موقع سے فائدہ اٹھانے کی کوشش نہیں کی اور ہم شکار ہو گئے، تمام کوچنگ اسٹاف کو مایوسی ہے کہ ٹیم کوئی میچ نہیں جیت سکی۔
ڈیرن سیمی نے کہا کہ جونیئر کی سطح پر لیگ درست سمت میں ایک قدم ہے، کھلاڑیوں کو اپنا ٹیلنٹ دکھانے کا موقع ملے گا، ٹی ٹوئنٹی کا ایکسپوژر نوجوانوں کو مستقبل میں کام آئے گا۔
انہوں نے مزید کہا کہ اس دوران ٹیلنٹ بھی سامنے آیا ہے، بیٹر باسط علی سمیت دو تین فاسٹ بولرز اور اسپنرز اچھے سامنے آئے ہیں۔
یاد رہے کہ پاکستان جونیئر لیگ کے دلچسپ اور سنسنی خیز میچز قذافی اسٹیڈیم لاہور میں جاری ہیں اور گزشتہ روز کھیلے گئے میچ میں گوجرانوالا جائنٹس نے حیدرآباد ہنٹرز کو 6 وکٹوں سے شکست دے دی ۔
