14 اکتوبر ، 2022 
رزاق کا پاکستان جونیئر لیگ کے کھلاڑیوں کو بڑا پلیئر بننے کیلئے مشورہ
14 اکتوبر ، 2022
حیدر آباد ہنٹرز کے کوچ عبدالرزاق نے پاکستان جونیئر لیگ کے پلے آف مرحلے میں نہ پہنچنے کی وجہ ناقص فیلڈنگ کو قرار دے دیا۔
سابق آل راؤنڈر نے جیو نیوز سے خصوصی گفتگو کرتے ہوئے کہا کہ ہم نے اہم مواقع پر آسان کیچز ڈراپ کیے، دوسرے میچ میں بھی اور چوتھے میچ میں بھی ایسا ہوا، اگر آپ کیچز نہیں پکڑیں گے تو کیسے میچز جیت سکتے ہیں۔
حیدر آباد ہنٹرز اپنے چاروں میچز ہار کر باہر ہو چکی ہے اس صورتحال کو عبدالرزاق نے مایوس کن قرار دیا۔
انہوں نے کہا کہ کھلاڑی ابھی سیکھنے کے مرحلے سے گزر رہے ہیں، ٹیسٹ سینٹر پر کھیل رہے ہیں، پچز اچھی ہیں آؤٹ فیلڈ تیز ہے، لائٹس اور کیمروں کا پریشر بھی ہے اور جب آپ ہار رہے ہوں تو پھر گھبرا جاتے ہیں اور فیلڈنگ میں غلطیاں کرتے ہیں۔
سابق کرکٹر کا کہنا تھا کہ آپ کو اپنے اعصاب پر قابو پانا ہے، اہم صورتحال میں دباؤ نہیں لینا یہ بات ذہن میں رہنی چاہیے کہ انٹرنیشنل لیول پر اچھا پلیئر بننے کے لیے فیلڈنگ بھی بہت اہم ہے اس کو نظر انداز نہیں کیا جا سکتا، یہ سب پلیئر پر منحصر ہے کہ وہ فیلڈنگ کو کتنی اہمیت دیتا ہے ہم تو کھلاڑیوں کو سمجھاسکتے ہیں۔
عبدالرزاق نے مزید کہا کہ انڈر 16 اور انڈر19 کی سطح پر میچز اچھے گراؤنڈز پر ہونے چاہئیں، اس لیول پر فیلڈنگ اچھی ہو گی تو قومی سطح پر فیلڈنگ کا معیار بڑھے گا، فیلڈنگ پر فوکس کرنے کی انتہائی ضرورت ہے۔
