21 نومبر ، 2022 
’عمران خان نے واضح کر دیا کہ انکی حکومت ختم کرنے اور ان پر حملے میں اسٹیبلشمنٹ کا ہاتھ نہیں‘
21 نومبر ، 2022
وزیراعلیٰ پنجاب چوہدری پرویز الہٰی نے کہا ہے کہ عمران خان نے واضح کر دیا ہے کہ ان کی حکومت ختم کرنے اور ان پر حملے میں اسٹیبلشمنٹ کا کوئی ہاتھ نہیں ہے۔
میڈیا سے گفتگو میں چوہدری پرویز الہٰی کا کہنا تھا عمران خان نے کیا حاصل کیا ہے آنے والے دنوں میں مکمل طور پر سامنے آ جائے گا۔
وزیر اعلیٰ چوہدری پرویز الٰہی کا کہنا تھا کہ پنجاب حکومت چیئرمین تحریک انصاف عمران خان کی حفاظت کرے گی اور انہیں مکمل سکیورٹی فراہم کرے گی۔
یاد رہے کہ گزشتہ روزعمران خان نے کہا تھا ان پر دوبارہ حملہ بھی ہو سکتا ہے لیکن اس کے باوجود وہ راولپنڈی پہنچیں گے۔
عمران خان کا کہنا تھا وہ زخمی ٹانگ کے ساتھ لانگ مارچ کی قیادت کریں گے اور جب پنڈی پہنچیں گے تو بتائیں گے کہ ان کا اسلام آباد سے راولپنڈی جانے کا مقصد کیا ہے۔
دوسری جانب وفاقی وزیر داخلہ رانا ثنا اللہ کا جیو نیوز کے پروگرام جرگہ میں گفتگو کرتے ہوئے کہنا تھا کہ عمران خان پر غیر ملکی ایجنسیاں حملہ کروا سکتی ہیں۔
