کاروبار

آئی ایم ایف کا وفد جنوری کے آخر میں پاکستان کا دورہ کرے گا: ذرائع

20 جنوری ، 2023

آئی ایم ایف وفد خزانہ، تجارت ، توانائی اورصنعت و پیداوار ، ایف بی آر، اسٹیٹ بینک، نیپرا اور اوگرا کے حکام سے بھی ملاقاتیں کرے گا: ذرائع— فوٹو: فائل

انٹرنیشنل مانیٹری فنڈ (آئی ایم ایف) کا وفد جنوری کے آخر میں پاکستان کا دورہ کرے گا۔

ذرائع وزارت خزانہ کے مطابق آئی ایم ایف اگلے ہفتے کے شروع میں اپنے وفد کے دورہ پاکستان کے شیڈول سے آگاہ کرے گا، آئی ایم ایف کا وفد دورے کے دوران مختلف محکموں کے عہدے داروں سے ملاقاتیں کرے گا،۔

ذرائع کا کہنا ہے کہ آئی ایم ایف وفد خزانہ، تجارت ، توانائی اورصنعت و پیداوار کے حکام سے ملاقاتیں کرے گا، آئی ایم ایف وفد ایف بی آر، اسٹیٹ بینک، نیپرا اور اوگرا کے حکام سے بھی ملاقاتیں کرے گا۔

ذرائع کا کہنا ہے کہ آئی ایم ایف کا وفد چاروں صوبائی دارالحکومتوں کا بھی دورہ کرے گا، وفد دورے کے دوران پروگرام کے نویں جائزہ کے بعد سفارشات مرتب کرے گا، وفد کی سفارشات کے بعد پاکستان کیلئے اگلی قسط جاری کرنے سے متعلق فیصلہ ہوگا۔

خیال رہے کہ آئی ایم ایف کی سخت شرائط پر عملدرآمد کے حوالے سے وزیراعظم کی جانب سے منظوری دیے جانے کے بعد پاکستان نے سیکرٹری فنانس کے ذریعے آئی ایم ایف کو تحریری طور پر درخواست بھیجی ہے کہ اپنا جائزہ مشن آئندہ ہفتے اسلام آباد بھیجیں تاکہ 7 ارب ڈالرز مالیت کے توسیعی فنڈ کی سہولت (ایکسٹینڈڈ فنڈ فیسیلٹی) کے 9 ویں جائزے کے معاملے میں پایا جانے والا ڈیڈلاک ختم ہو۔

اعلیٰ سینیئر حکام نے صحافیوں کے ایک گروپ سے بات چیت کرتے ہوئے تصدیق کی ہے کہ وزیراعظم نے دوسرے روز بھی اعلیٰ سطح کے ایک اجلاس کی آن لائن صدارت لاہور سے کی جس میں فیصلہ کیا گیا کہ آئی ایم ایف کے جائزہ مشن کو اسلام آباد دورے کی دعوت دی جائے۔