12 فروری ، 2023 
ننکانہ توہین مذہب واقعہ، مشتعل افراد کے پہنچنے پر پولیس عملہ تھانے سے فرار ہو گیا تھا
12 فروری ، 2023
ننکانہ صاحب کے قصبے وار برٹن میں دو روز قبل مشتعل افراد نے توہین مذہب کے ملزم کو تھانے سے نکال کر ہلاک کر دیا تھا۔
مشتعل افراد کے پہنچنے پر تھانے کا ایس ایچ او اور دیگر عملہ تھانہ چھوڑ کر بھا گ گیا تھا جس کے باعث مشتعل افراد کو موقع ملا اور ہجوم نے توہین مذہب کے ملزم کو ہلاک کر دیا۔
آئی جی پنجاب عثمان انور نے واقعے کا نوٹس لیتے ہوئے ڈی ایس پی ننکانہ سرکل نواز ورک اور ایس ایچ او تھانہ وار برٹن فیروز بھٹی کو معطل کر دیا جبکہ وزیراعظم شہباز شریف نے تحقیقات کا حکم دیا ہے۔
دوسری جانب ننکانہ صاحب میں توہین مذہب کے الزام میں قتل کے واقعے کی ایف آئی آر درج کر کے واقعے میں ملوث افراد کی گرفتاری کے لیے کارروائی شروع کر دی گئی ہے۔
نگران وزیراعلیٰ پنجاب محسن نقوی نے واقعے پر 3 رکنی تحقیقاتی کمیٹی تشکیل دی ہے جو 48 گھنٹے میں رپورٹ پیش کرے گی۔
اہل علاقہ کے مطابق ملزم مقدس اوراق پر سابق بیوی کی تصویر لگا کر جادو ٹونا کرتا تھا اور وہ حال ہی میں ایسے ہی جرم میں 2 سال کی سزا کاٹ کر واپس آیا تھا۔
آرپی او شیخوپورہ بابر افتخار کے مطابق مشتعل افراد نے لاش کو جلانے کی کوشش بھی کی، ملوث افراد کے خلاف کارروائی کی جائے گی۔
