05 اپریل ، 2023 
میرے پڑوسی تندور والے کو جیل میں آکوموڈیٹ کریں، پی ٹی آئی کے سابق ایم پی اے کی آڈیو لیک
05 اپریل ، 2023
پاکستان تحریک انصاف سے تعلق رکھنے والے سابق رکن خیبرپختونخوا اسمبلی عبد السلام آفریدی کی سپرنٹنڈنٹ جیل مردان کو اپنے بندے بھرتی کرنے سے متعلق آڈیو لیک ہوگئی۔
آڈیو لیک میں عبدالسلام آفریدی سپرنٹنڈنٹ سینٹرل جیل مردان کو اپنے بندوں کی بھرتی کا کہہ رہے ہیں۔
عبدالسلام آفریدی نے آڈیو میسج میں کہا کہ جیل میں ہونے والی بھرتیوں میں میرے کتنے بندے بھرتی کرسکتے ہیں؟ میرے ہمسائے تندور والے کو جیل میں آکوموڈیٹ کریں۔
عبدالسلام آفریدی نے پھر کہا ہے کہ انٹرویو میں اپنے بندے بھیج رہا ہوں، اس بار انڑویومنسوخ نہیں کرنا، میرے تین بندوں کے انٹرویوز ہوئے ہیں ان کے آرڈرز مجھے چاہیئیں۔
اس معاملے پر جیونیوز سے گفتگو میں سپرنٹنڈنٹ سینٹرل جیل مردان ریاض خان کا کہناتھا کہ سابق ایم پی اے معمول کے مطابق اپنے بندوں کی بھرتی کی سفارش کرتے رہتے تھے، عبدالسلام آفریدی میرٹ سے برعکس بھرتیوں کا کہہ رہے تھے، ان کے بندے میرٹ پرنہیں تھے اس لیے بھرتی نہیں کیا۔
سپرنٹنڈنٹ سنٹرل جیل مردان کا کہناتھا کہ بندے بھرتی نہ کرنے کی صورت میں مجھے دھمکیاں دی گئیں۔
سابق ایم پی اے عبدالسلام آفریدی نے آڈیوز مسیجز سے متعلق بتایا کہ جو حکومت بھی آتی ہے وہ اپنے ورکرز کی بھرتیوں کا کہتی ہے، کلاس فورکی بھرتی میں تعلیمی قابلیت یا کسی میرٹ کی ضرورت نہیں ہوتی۔
انہوں نے کہا کہ سپرنٹنڈنٹ جیل مردان نے میرے بندے بھرتی ہی نہیں کیے، وہ اپنی کرپشن چھپانے کے لیے یہ سب کچھ کر رہے ہیں۔
