پشاور … پشاور کے علاقے ڈھکی نعلبندی میں اے این پی کے اجلاس کے قریب دھماکا ہوا ہے جس میں سینئر وزیر خیبرپختونخوا بشیر بلور شدید زخمی ہوگئے جبکہ ان کے پرسنل سیکریٹری اور ایس ایچ او تھانہ کابلی سمیت 4 افراد جاں بحق ہوگئے ہیں، واقعے میں پولیس اہلکاروں سمیت 18 افراد زخمی ہوگئے ، ہلاکتوں میں اضافے کا خدشہ بھی ظاہر کیا جارہا ہے۔ نمائندہ جیو نیوز کے مطابق قصہ خوانی بازار کے قریب ڈھکی نعلبندی کے علاقے میں اے این پی کے مقامی رہنما کے گھر پر بشیر احمد بلور کی زیر صدارت ایک اجلاس ہورہا تھا کہ اس موقع پر ایک زور دھماکا ہوگیا، دھماکے کی نوعیت سے متعلق تاحال کچھ معلوم نہیں ہوسکا، دھماکے میں بشیر احمد بلور شدید زخمی ہوگئے ہیں انہیں اسپتال منتقل کردیا گیا جہاں ان کا آپریشن جاری ہے، جبکہ ان کے پرسنل سیکریٹری سمیت سیکیورٹی پر تعینات ایس ایچ او تھانہ کابلی عبدالستار خان سمیت 4 افراد جاں بحق ہوگئے ہیں، واقعے میں پولیس اہلکاروں سمیت 18 افراد زخمی بھی ہوئے جن میں کئی کی حالت تشویشناک بتائی جاتی ہے۔18 زخمیوں کو اسپتال منتقل کردیا گیا جہاں ان کی جان بچانے کی کوششیں کی جارہی ہے۔ دھماکا کافی زور دار تھا جس کی آواز تقریباً پورے پشاور شہر میں سنی گئی، دھماکے میں قریبی عمارتوں ، گاڑیوں اور دکانوں کو بھی نقصان پہنچا ہے ۔ پولیس اور دیگر سیکیورٹی اداروں نے علاقے کو گھیرے میں لے لیا ہے۔ عینی شاہدین کے مطابق دھماکا خود کش تھا۔