پشاور … پشاور کے علاقے ڈھکی نعلبندی میں اے این پی کے اجلاس کے بعد خود کش دھماکا ہوا ہے جس میں سینئر وزیر خیبرپختونخوا بشیر احمد بلور شدید زخمی ہوگئے جبکہ ان کے پرسنل سیکریٹری اور ایس ایچ او تھانہ کابلی سمیت 6 افراد جاں بحق ہوگئے، واقعے میں پولیس اہلکاروں سمیت 18 افراد زخمی بھی ہوئے ہیں، ہلاکتوں میں اضافے کا خدشہ بھی ظاہر کیا جارہا ہے۔ نمائندہ جیو نیوز کے مطابق قصہ خوانی بازار کے قریب ڈھکی نعلبندی کے علاقے میں اے این پی کے مقامی رہنما کے گھر پر بشیر احمد بلور کی زیر صدارت ایک اجلاس ہوا جس کے بعد سینئر وزیر جیسے ہی باہر آئے خود کش حملہ آور نے خود کو دھماکے سے اڑالیا جس کے نتیجے میں ایس ایچ او کابلی عبدالستار ، بشیر بلور کے پرسنل سیکریٹری سمیت 6 افراد جاں بحق ہوگئے جبکہ سینئر وزیر خیبرپختونخوا بشیر احمد بلور شدید زخمی ہوئے ، واقعے میں 15 سے زائد دیگر افراد بھی زخمی ہوئے ہیں۔ اسپتال انتظامیہ کے مطابق بشیر احمد بلور کو شدید زخمی حالت میں اسپتال لایا گیا جس کے بعد انہیں آپریشن تھیٹر منتقل کردیا گیا جہاں ان کا آپریشن جاری ہے، پولیس اہلکاروں سمیت 18 زخمیوں میں بھی کئی کی حالت تشویشناک بتائی جاتی ہے۔ ذرائع کے مطابق دھماکا انتہائی زور دار تھا جس کی آواز تقریباً پورے پشاور شہر میں سنی گئی، دھماکے میں قریبی عمارتوں، دکانوں اور گاڑیوں کو بھی نقصان پہنچا ۔ پولیس اور دیگر سیکیورٹی اداروں نے دھماکے کے مقام کو گھیرے میں لے لیا ہے۔