کھیل

کیوی کپتان پہلی بار پاکستان میں ٹی ٹوئنٹی میچ کھیلنے کیلئے پُرجوش

14 اپریل ، 2023

دورہ پاکستان پر آئی نیوزی لینڈ کرکٹ ٹیم کے کپتان ٹام لیتھم کا کہنا ہے کہ پاکستان ایک کوالٹی ٹیم ہے، کوشش کریں گے جتنا اچھا ہو کھیل پیش کریں۔

گزشتہ روز لاہور میں پاکستان اور نیوزی لینڈ کے درمیان ٹی ٹوئنٹی سیریز کی ٹرافی کی رونمائی کی گئی۔

ٹرافی کی رونمائی کے بعد پریس کانفرنس کرتے ہوئے کیوی کرکٹ ٹیم کے کپتان ٹام لیتھم نے کہا کہ ہماری ٹیم میں اہم کھلاری شامل نہیں، وہ آئی پی ایل کھیل رہے ہیں، یہ نئے لڑکے اچھا پرفارم کریں گے ، ان کے پاس اچھا موقع ہے۔

انہوں نے کہا کہ ہماری تیاری آئیڈیل نہیں،کیونکہ وقت کم تھا، سری لنکا کے خلاف سیریز ختم ہوتے ہی یہاں پہنچ گئے،کوشش کریں گے جلد از جلد ہم آہنگ ہوں لیکن وقت کا کم ہونا اپنی جگہ ہے۔

ٹام لیتھم کا کہنا تھا کہ پہلی مرتبہ پاکستان میں ٹی ٹوئنٹی کھیل رہا ہوں، پرجوش ہوں، پاکستان کے پاس اچھے میچ ونرز اور بولرز ہیں۔

یہ بھی پڑھیں

انہوں نے کہا کہ سری لنکا کے خلاف ہم نے اچھی کرکٹ کھیلی اور ان پر دباؤ بھی ڈالا، ہماری ٹیم نوجوان کھلاڑیوں پر مشتمل ہے، ڈیرل میچل اور جمی نیشم کو دنیا بھر میں کھیلنے کا تجربہ ہے، پاکستان کے کوالٹی فاسٹ بولرز ہیں، اسپیڈ کے ساتھ وہ ڈیتھ اوورز میں بھی اچھے ہیں۔

کیوی کپتان نے کہا کہ ہمیں اپنے پلان کے مطابق کھیلنا ہوگا، ہم نے کراچی میں ون ڈے کرکٹ کھیلی ہے، اب لگتا ہے کہ اس سیریز میں پیچز مختلف ہوں گی۔

واضح رہے کہ دونوں ٹیموں کے درمیان پانچ میچز پر مشتمل سیریز کا پہلا ٹی ٹوئنٹی میچ آج رات 9 بجے شروع ہو گا۔