26 اپریل ، 2023 
سابق سی سی پی او لاہور عمران خان پر قاتلانہ حملے کی تفتیش کی فائل بھی ساتھ لے گئے
26 اپریل ، 2023
وزیرآباد میں عمران خان پر قاتلانہ حملے کی تفتیش کی فائل سابق سی سی پی او لاہور غلام محمود ڈوگر اپنے ساتھ لے گئے۔
عمران خان پر حملے کی تفتیش کرنے والی جوائنٹ انویسٹی گیشن کمیٹی (جے آئی ٹی) کو فائل نہ مل سکی، جےآئی ٹی نے انسداد دہشت گردی عدالت سے رجوع کر لیا۔
جے آئی ٹی ذرائع کا کہنا ہے کہ کیس فائل نہ ملنے سے تفتیش بھی شروع نہیں ہو سکی، تفتیش کے لیے کئی بار غلام محمود ڈوگر سے فائل مانگی، ان کا جواب ہے کہ یاسمین راشد نے عدالت عالیہ میں درخواست دائر کی ہوئی ہے، ہائیکورٹ کے فیصلے تک فائل نہیں دے سکتے۔
جے آئی ٹی کے مطابق اہم دستاویزات واپس نہ کرنے پر ریاست کی جانب سے مقدمہ درج کرایا جا سکتا ہے۔
یاد رہے کہ سابق سی سی پی او لاہور غلام محمود ڈوگر چند روز قبل ہی ملازمت سے ریٹائر ہوئے ہیں۔
