پاکستان

پی ڈی ایم موجودہ چیف جسٹس کے دور میں عام انتخابات نہیں چاہتی

06 مئی ، 2023

پی ڈی ایم جلد الیکشن کیلئے تیار ہے لیکن 16؍ ستمبر سے پہلے نہیں۔ یہ تاریخ چیف جسٹس پاکستان عمر عطا بندیال کی ریٹائرمنٹ کی تاریخ ہے۔

پی ڈی ایم کے ایک باخبر ذریعے کا کہنا تھا حکمران اتحاد 16؍ ستمبر کے بعد الیکشن کیلئے کسی بھی تاریخ کیلئے تیار ہوگا۔

ذریعے نے پارلیمنٹ کی مدت میں توسیع کے امکان کو بھی مسترد کر دیا، جیسا کہ ماضی میں حکمران اتحاد کے کچھ رہنماؤں نے اشارہ دیا تھا۔

یہ بھی پڑھیں

ذریعے نے کہا کہ ہم 13؍ اگست سے آگے نہیں جائیں گے۔ 13؍ اگست کو قومی اسمبلی اپنی مدت مکمل کر لے گی۔ کہا جاتا ہے کہ 13؍ اگست سے آگے جانے سے حکمران اتحاد کو سیاسی لحاظ سے بہت زیادہ نقصان ہوگا۔

ذریعے نے کہا کہ اگر پی ڈی ایم اور پی ٹی آئی والے الیکشن کی تاریخ کے حوالے سے کسی معاہدے کیلئے بات چیت کا سلسلہ جاری رکھتے ہیں تو قومی اسمبلی کی تحلیل جولائی میں ممکن ہے لیکن جون میں کسی بھی طرح سے ایسا نہیں ہوگا۔

کہا جاتا ہے کہ حکومت بجٹ کے معاملے پر سمجھوتا نہیں کرے گی، حکومت چاہتی ہے کہ وہ بجٹ پیش کرے اور اسے آئی ایم ایف کے ساتھ طے شدہ شرائط کے مطابق پارلیمنٹ سے منظور کرائے۔

کہا جاتا ہے کہ بجٹ نگراں حکومت کیلئے نہیں چھوڑا جا سکتا کیونکہ حکمران اتحاد کو ڈر ہے کہ ملک نازک موڑ پر کھڑا ہے، عبوری حکومت آئی ایم ایف کے ساتھ معاملہ سازی نہیں کر پائے گی لہٰذا ڈیفالٹ کا خطرہ مول نہیں لیا جا سکتا۔

ذریعے نے یقین دہانی کرائی کہ آئندہ بجٹ آئی ایم ایف کے ساتھ طے شدہ شرائط کے مطابق منظور کیا جائے گا۔ انہوں نے اس تاثر کو مسترد کر دیا کہ آئی ایم ایف کی شرائط کی خلاف ورزی کرتے ہوئے مقبول بجٹ پیش کیا جائے گا۔