کہوٹہ روڈ بحال کرنےکی یقین دہانی، آئل ٹینکرز ایسوسی ایشن نے ہڑتال کی کال واپس لے لی
05 جون ، 2023
آئل ٹینکرز ایسوسی ایشن کی جانب سے جڑواں شہروں کی انتظامیہ کے خلاف احتجاج رنگ لے آیا اور ضلعی انتظامیہ راولپنڈی کی جانب سے تین روز میں کہوٹہ روڈ کو بحال کرنے کی یقین دہانی پر آئل ٹینکر ایسوسی ایشن نے احتجاج ختم کردیا۔
آئل ٹینکرز ایسوسی ایشن کے احتجاج کے باعث جڑواں شہروں راولپنڈی و اسلام آباد میں سہالہ ڈپو سے سپلائی بند کردی گئی تھی اور انتظامی رویے کے خلاف احتجاج کیا گیا۔
احتجاجی مظاہرے میں ڈرائیورز اور ٹینکرز ایسوسی ایشن کے عہدیدار شامل ہوئے اور ہائی وے ڈیپارٹمنٹ کے خلاف نعرے بازی کی۔
بعدازاں انتظامیہ سے مذاکرات کامیاب ہونے کے بعد آئل ٹینکرز ایسوسی ایشن نے ہڑتال کی کال واپس لے لی جبکہ آئل ٹینکر ایسوسی ایشن کے مطالبے پرضلعی انتظامیہ نے کہوٹہ روڈ پر کام کا آغاز کردیا اور اعلان کیا کہ جڑواں شہروں میں آج سے پیٹرول کی سپلائی کو بحال کیا جارہا ہے۔
واضح رہے کہ گزشتہ 3 سال سے کہوٹہ روڈ خستہ حالی کا شکار ہے جس کی باعث ضلعی انتظامیہ کو متعدد بار روڈ کی تعمیر کا کام مکمل کرنے کی درخواست کی گئی لیکن شنوائی نہ ہونے پر احتجاج کی کال دی گئی تھی۔
