10 اگست ، 2023 
پشاور پولیس کا ڈاکوؤں سے فائرنگ کا تبادلہ، ایک اہلکار شہید، ڈکیت ہلاک
10 اگست ، 2023
پشاور میں پولیس اور ڈکیتوں کے درمیان فائرنگ کے تبادلے میں ایک پولیس اہلکار شہید ہو گیا جبکہ پولیس کی جوابی فائرنگ سے ایک ڈکیت بھی مارا گیا۔
پولیس کے مطابق پشاور کے عمر گل روڈ پر پولیس نے ڈکیتوں کا تعاقب کیا جس پر انہوں نے پولیس پر فائرنگ کر دی، ڈکیتوں کی فائرنگ سے ایک پولیس اہلکار سرور شاہ شہید ہو گیا۔
پولیس کا کہنا تھا کہ ڈاکوؤں کے خلاف پولیس کی جوابی فائرنگ سے ایک ڈکیت ہلاک ہوا جبکہ اس کا دوسرا ساتھی فرار ہونے میں کامیاب ہو گیا۔
پولیس کے مطابق شہید کانسٹیبل سرور شاہ کی نماز جنازہ پشاور پولیس لائنز میں ادا کردی گئی جہاں پولیس کے دستے نے شہید کے جسد خاکی کو سلامی پیش کی۔
شہید کانسٹیبل سرور شاہ کی نماز جنازہ میں نگراں وزیراعلیٰ اعظم خان، ڈی آئی جی ظفر خان اور ایس ایس پی آپریشنز سمیت دیگر پولیس افسران نے شرکت کی اور شہید کی جسد خاکی کو سلامی بھی پیش کی۔
