01 ستمبر ، 2023 
ویڈیو: کراچی میں سی ویو پر شہری زبردستی جیپ لے کر پانی میں جاگھسا، گاڑی سمندر میں پھنس گئی
01 ستمبر ، 2023
کراچی: سی ویو پر شہری کو زبردستی جیپ لے کر پانی میں جانا مہنگا پڑ گیا۔
جیونیوز کے مطابق کراچی کے ساحل سی ویو پر ایک شہری جیپ لے کر پانی میں جا گھسا جس کی وجہ سے اس کی جیپ پانی میں پھنس گئی جب کہ گاڑی میں اس کے اہلخانہ بھی موجود تھے۔
لائف گارڈز کا کہنا ہےکہ شہری کو جیپ سمندر میں لے جانے سے روکا بھی گیا لیکن وہ بدضد رہا اور جیپ پانی میں لے گیا۔
پولیس کے مطابق گاڑی میں پوری فیملی موجود تھی اور پانی کا بہاؤ تیز ہونے کی وجہ سے گاڑی پھنسی جس کے بعد فیملی اپنی مدد آپ کے تحت گاڑی سے واپس نکلی۔
ایس ایس پی ساؤتھ کے مطابق پولیس کے پاس سمندر میں پھنسی چیز نکالنے کے آلات نہیں اور جیپ نکالنا بھی پولیس کا کام نہیں تاہم اس کارروائی کے لیے ریسکیو اہلکاروں کو طلب کیا گیا ہے۔
