16 ستمبر ، 2023 
بھارت: اپوزیشن اتحاد کا نفرت پر مبنی مودی ایجنڈا چلانیوالے اینکرز کے بائیکاٹ کا اعلان
16 ستمبر ، 2023
بھارتی اپوزیشن اتحاد نے نفرت پر مبنی ہندو انتہا پسند مودی سرکار کے ایجنڈے کا پرچار کرنے والے نیوز اینکرز کے بائیکاٹ کا فیصلہ کیا ہے۔
بھارتی میڈیا کے مطابق اپوزیشن اتحاد نے 14ٹی وی اینکرز کے پروگراموں میں شرکت نہ کرنے کا اعلان کیا ہے۔
اپوزیشن اتحاد کے مطابق شور مچانے والے اینکرز نیوز ٹاک شوز میں بی جے پی کے ایجنڈے کے تحت کام کر رہے ہیں، بی جے پی کے ایجنڈے میں مسلم اور مسیحی اقلیتوں کے خلاف مہم چلانا شامل ہے۔
اس حوالے سے بھارت کی سب سے بڑی اپوزیشن جماعت کانگریس کے ترجمان کا کہنا ہے کہ نفرت سے بھرے بیانیے کو جائز نہیں بنانا چاہتے جو معاشرے میں بگاڑ پیدا کر رہا ہے، ہم نفرت بھرے ان ٹاک شوز میں حصہ نہیں لیں گے۔
یاد رہے کہ بھارت آزادی صحافت کی 180 ممالک کی درجہ بندی میں 21 پوائنٹس کی کمی کے بعد 161 ویں نمبر پر ہے۔
