09 دسمبر ، 2023 
چلاس: بچوں اور شوہر کو فائرنگ سے بچانے والی روشن بی بی علاج کیلئے کراچی منتقل
09 دسمبر ، 2023
چلاس میں بس پر دہشتگردوں کی فائرنگ کے دوران بچوں اور شوہر کی جان بچانے کے لیے خود گولیوں سے زِخمی ہونے والی روشن بی بی کو علاج کیلئے کراچی کے نجی اسپتال منتقل کردیاگیا۔
گزشتہ رات قومی ائیرلائن کی پرواز کے ذریعے روشن بی بی کو کراچی منتقل کیا گیا جہاں سے انہیں ایمبولینس میں نجی اسپتال منتقل کیا گیا۔
روشن بی بی کے اہل خانہ نے بتایا کہ اسپتال میں فوری طور پر ان کا علاج شروع کردیا گیا ہے، ضروری میڈیکل ٹیسٹ کیے جارہے ہیں اور رپورٹ آنے کے بعد طبی ماہرین آپریشن کر کے ان کے جسم سے مزید گولیاں نکالیں گے۔
روشن بی بی شوہر اور 2 بچوں کے ہمراہ کراچی جانے کے لیے اس بد قسمت مسافر بس میں سوار تھیں جس کو دہشتگردوں نے 2 دسمبر کی شام فائرنگ کا نشانہ بنایا، فائرنگ کے دوران باہمت خاتون روشن بی بی نے اپنے دونوں بچوں اور شوہر کو بس کے فرش پر لٹایا اور اُن کی حفاظت کے لیے خود اُن پر لیٹ گئیں۔
اس دوران روشن بی بی کو 6 گولیاں لگیں جب کہ ان کے بچے اور شوہر فائرنگ سے محفوظ رہے۔
