25 فروری ، 2024 
اکبر ایس بابر نے پی ٹی آئی کے انٹرا پارٹی الیکشن کو غیر قانونی قرار دے دیا
25 فروری ، 2024
پاکستان تحریک انصاف کے بانی رکن اکبر ایس بابر نے 3 مارچ کو ہونے والے پی ٹی آئی کے انٹرا پارٹی الیکشن کو غیر قانونی قرار دیتے ہوئے اعلیٰ عدلیہ میں چیلنج کرنے کا اعلان کر دیا۔
اکبر ایس بابر نے جیو نیوز سے گفتگو کرتے ہوئے کہا کہ الیکشن کمیشن سے انٹرا پارٹی انتخابات دستاویزات حاصل کر کے اسے چیلنج کیا جائے گا۔
انہوں نے کہا کہ فارم 65 جمع کروائے، اس کو بھی مسترد کروا دیا گیا، جب سارے عمل کو سپریم کورٹ نے کالعدم کیا تو عہدے غیر قانونی ہیں، یہ سارا عمل کالعدم ہے اور اس کی قانونی حیثیت کوئی نہیں ہو گی۔
اکبر ایس بابر کا کہنا تھا کہ الیکشن کمیشن کے سامنے معاملے کو رکھیں گے اور تمام گروپ لائحہ عمل طے کریں، سپریم کورٹ کے فیصلے کو موجودہ کالعدم قیادت نے چیلنج کر رکھا ہے۔
واضح رہے کہ پاکستان تحریک انصاف کے 3 مارچ کو ہونے والے انٹراپارٹی انتخابات کے لیے کاغذاتِ نامزدگی جمع کروانے کا وقت ختم ہوگیا۔
اعلامیہ کے مطابق امیدوار برائے چیئرمین بیرسٹر گوہر علی اور امیدوار برائے مرکزی سیکرٹری جنرل عمر ایوب کی قیادت میں 15 رکنی پینل نے کاغذاتِ نامزدگی جمع کروائے۔
