02 فروری ، 2013 
سرائے نورنگ آرمی کیمپ پر حملہ ،12شدت پسند ہلاک ،13اہلکارشہید
02 فروری ، 2013
لکی مروت…ضلع لکی مروت کی تحصیل سرائے نورنگ میں سیکیورٹی فورسز کے کیمپ پر حملے میں 13 سیکیورٹی اہل کار شہید اور 12شدت پسند مارے گئے۔ جھڑپوں کے دوران شدت پسندوں کی ایک مکان میں فائرنگ سے ایک ہی خاندان کے 10افراد بھی جاں بحق ہوگئے۔سیکیورٹی ذرائع کا کہنا ہے کہ رات تقریباً تین بجے سرائے نورنگ میں سیکیورٹی فورسز کے کیمپ پرشدت پسندوں نے بھاری ہتھیاروں سے حملہ کیا۔ اس دوران شدید فائرنگ ہوئی اوردھماکے سنے گئے۔سیکیورٹی اہلکاروں کی مدد کیلئے بنوں سے بھی اہلکار سرائے نورنگ پہنچے۔ عسکری ذرائع کا کہنا ہے کہ زخمی اہلکاروں کو سی ایم ایچ پشاور اور بنوں کے اسپتال منتقل کردیا گیا ہے۔ آرمی کالونی کے قریب سابق پٹواری کے مکان میں داخل ہوکر شدت پسندوں نے فائرنگ کردی جس سے تین بچوں اور تین خواتین سمیت ایک ہی خاندان کے 10 افراد جاں بحق ہوگئے۔کالعدم تحریک طالبان نے آرمی کیمپ حملے کی ذمہ داری قبول کرلی ہے۔
