21 جون ، 2024 
عمران خان کیخلاف 190 ملین پاؤنڈ ریفرنس، نیب کے 2 گواہوں پر جرح مکمل
21 جون ، 2024
اسلام آباد کی احتساب عدالت نے پاکستان تحریک انصاف کے بانی عمران خان کے خلاف 190 ملین پاؤنڈ ریفرنس کی سماعت 2 جولائی تک ملتوی کردی۔
احتساب عدالت کے جج محمد علی وڑائچ نے اڈیالہ جیل میں ریفرنس پر سماعت کی۔ بانی پی ٹی آئی اور ان کی اہلیہ بشریٰ بی بی کمرہ عدالت میں موجود تھے۔ نیب کی جانب سے پراسیکیوٹر چوہدری نذر، عرفان بھولا اور سہیل عارف جبکہ بانی پی ٹی آئی اور بشریٰ بی بی کے وکلا عثمان گل، ظہیر عباس چوہدری پیش ہوئے۔
سماعت کے دوران نیب کے دو گواہان پر جرح مکمل کرلی گئی جبکہ دو پر ابتدائی جرح کی گئی۔
بشریٰ بی بی کی جانب سے طبی معائنے کی درخواست عدالت میں جمع کرائی گئی جس پر عدالت نے جیل حکام کو ان کا طبی معائنہ کرانے کا حکم دیا۔
عدالت نے ریفرنس کی سماعت 2 جولائی تک ملتوی کردی۔
