19 جولائی ، 2024
بالی وڈ اداکارہ گوہر خان نے دھوتی پہننے کی وجہ سے ایک شخص کو شاپنگ مال میں داخل نہ ہونے دینے پر مال انتظامیہ کو سخت تنقید کا نشانہ بنایا ہے۔
بھارتی میڈیا رپورٹس کے مطابق ریاست کرناٹک کے شہر بنگلورو میں روایتی دھوتی کرتا پہنے شخص کو شاپنگ مال سے باہر نکال دیا گیا، فقیراپا نامی ایک 70 سالہ کسان کو منگل کی شام روایتی لباس کی وجہ سے شاپنگ مال سے باہر نکالا گیا۔
واقعے کی ویڈیو سوشل میڈیا پر آنے کے بعد عوام میں بھی غم و غصے کی لہر دوڑ گئی۔
اداکارہ گوہر خان نے انسٹاگرام اسٹوری پر اپنے رد عمل کا اظہار کرتے ہوئے لکھا کہ ’یہ بالکل شرمناک ہے، شاپنگ مال کے خلاف سخت کارروائی کی جانی چاہیے، یہ بھارت ہے اور ہمیں اپنی ثقافت پر فخر ہونا چاہیے‘۔
اس کسان کے بارے میں بتایا جارہا ہے کہ وہ اپنے بیٹے کے ساتھ فلم دیکھنے کے لیے مال گیا تھا جس کے پاس ٹکٹس بھی موجود تھے۔