01 نومبر ، 2024 
کراچی میں رواں سال اکتوبر کی راتیں تاریخ کی گرم ترین راتیں رہیں، 57 سالہ ریکارڈ ٹوٹ گیا
01 نومبر ، 2024
کراچی میں رواں سال اکتوبر کی راتیں شہر کی موسمیاتی تاریخ کی گرم ترین راتیں رہیں۔
محکمہ موسمیات نے بتایا کہ شہر کے کم سے کم اوسط درجہ حرارت کا 57 سال کا ریکارڈ بھی ٹوٹ گیا۔
محکمہ موسمیات کے مطابق 1967 میں کم سے کم اوسط درجہ حرارت 30.6 ڈگری ریکارڈ ہوا تھا لیکن گزشتہ ماہ شہر کا کم سے کم اوسط درجہ حرارت 30.9 ڈگری رہا، اس طرح 57 سال بعد کم سے کم اوسط درجہ حرارت 0.3 ڈگری زائد رہا۔
محکمہ موسمیات کا کہنا ہےکہ شہر کے رات کے کم سے کم درجہ حرارت کا ایک سال کا ریکارڈ بھی ٹوٹ گیا، رواں سال اکتوبر میں رات کا درجہ حرارت 26.3 ڈگری ریکارڈ ہوا جب کہ اکتوبر 2023 میں رات کا کم سے کم درجہ حرارت 25.7 ڈگری ریکارڈ ہوا تھا۔
محکمہ موسمیات نے مزید بتایا کہ کراچی میں اس سال اکتوبرکا کم سے کم درجہ حرارت 0.6 ڈگری زائد رہا۔
