19 نومبر ، 2024 
لیلیٰ زبیری کو بالی وڈ کے کس لیجنڈ اداکار نے فلم میں کام کی پیشکش کی؟
19 نومبر ، 2024
اداکارہ لیلیٰ زبیری نے انکشاف کیا ہےکہ بالی وڈ کے لیجنڈ اداکار آنجہانی راج کپور نے انہیں فلم میں کام کی پیشکش کی تھی۔
جیو نیوز کے کامیڈی پروگرام 'ہنسنا منع ہے' میں پاکستان کی سینئر اداکارہ لیلیٰ زبیری نے بطور مہمان شرکت کی جہاں میزبان تابش ہاشمی نے دلچسپ سوال کے ساتھ مختلف کھیل بھی کھیلے۔
پروگرام میں شریک شرکا نے اداکارہ سے مختلف سوال کیے، ایک سوال کا جواب دیتے ہوئے لیلیٰ زبیری نے کہا کہ شارجہ کپ میں پاکستانی اداکاروں کو دعوت دی گئی تھی، وہاں پر بالی وڈ کے لیجنڈ اداکار راج کپور سے ملاقات ہوئی اور انہوں نے ملاقات میں مجھے اپنی فلم میں کام کرنے کی پیشکش کی۔
اداکارہ نے کہا کہ راج کپور کی جانب سے فلم میں کام کرنے کی پیشکش میرے لیے باعث فخر تھی لیکن میں نے اس پیشکش کو پاکستان کیلئے ٹھکرا دیا تھا کیونکہ اس وقت میں نے یہ ہی سوچا تھا کہ پاکستان کیلئے ہی کام کرنا چاہیے۔
انہوں نے مزید کہا کہ اس کے علاوہ راج کپور نے ہماری تصاویر پر آٹوگراف مانگے اور ساتھ ہی بالی وڈ سپر اسٹار نے یہ بھی کہا کہ ہم اپنی پونے اکیڈمی میں بچوں کو پڑھانے اور سکھانے کیلئے آپ کے ڈرامے دکھاتے ہیں۔
