21 نومبر ، 2024 
پاکستان
فوٹو: فائل
مذاکرات ہوئے بھی تو پی ٹی آئی کے پر امن رہنے کی ضمانت کون دے گا؟ عطا تارڑ
21 نومبر ، 2024
وفاقی وزیر اطلاعات عطا تارڑ نے کہا ہے کہ بانی پی ٹی آئی کی رہائی کا ابھی کوئی امکان نہیں۔
جیو نیوز سے گفتگو کرتے ہوئے انہوں نے کہا کہ ابھی تک 9 مئی کے 8 مقدمات میں ان کی ضمانت نہیں ہوئی۔
وزیر اطلاعات کا کہنا تھا کہ توشہ خانہ 2 میں بانی پی ٹی آئی کی ضمانت ہوئی ہے، مقدمہ ابھی چل رہا ہے، مقدمے کیلئے بہت شواہد ہیں، ٹرائل کورٹ میں کیس آگے بڑھے گا تو ضمانت ختم بھی ہو سکتی ہے۔
مذاکرات کے سوال پر وزیر اطلاعات عطا تارڑ نے کہا کہ مذاکرات ہوئے بھی تو پی ٹی آئی کے پر امن رہنے کی ضمانت کون دے گا؟
ان کا کہنا تھا کہ یہ بات سب کو معلوم ہے کہ 9 مئی واقعات کے احکامات پی ٹی آئی قیادت نے ہی دیے تھے۔
