03 دسمبر ، 2024 
دنیا کے سب سے بڑے بینک فراڈ کی ماسٹر مائنڈ کو سزائے موت سے بچنے کیلئے بڑی پیشکش کردی گئی
03 دسمبر ، 2024
ویتنام کی خاتون پراپرٹی ٹائیکون ٹرونگ می لان کی بینک فراڈ کیس میں سزائے موت کے خلاف اپیل مسترد کر دی گئی تاہم ان کے پاس موت کی سزا سے بچنے کا ایک راستہ موجود ہے۔
برطانوی میڈیا کے مطابق ٹرونگ می لان کو دنیا کی سب سے بڑی بینک فراڈ اسکیم کا ماسٹر مائنڈ قرار دیا گیا تھا۔
اپریل میں عدالت نے انہیں سائیگون کمرشل بینک جو ملک کا پانچواں سب سے بڑا بینک ہے، کو خفیہ طور پر کنٹرول کرنے کا مجرم قرار دیا تھا۔
استغاثہ کے مطابق ٹرونگ می لان نے 10 سال سے زائد عرصے میں جعلی کمپنیوں کے ذریعے 44 ارب ڈالر کے قرضے اور کیش حاصل کیے جن میں سے 12 ارب ڈالر کی رقم خرد برد کی گئی جس پر انہیں موت کی سزا سنائی گئی تھی۔
یہ ایک غیر معمولی اور چونکا دینے والا فیصلہ تھا کیونکہ ویتنام میں وائٹ کالر جرائم کے لیے کسی خاتون کو موت کی سزا دینے کی مثالیں کم ہی ملتی ہیں۔
68 سالہ ٹرونگ می لان کے پاس اب اپنی زندگی بچانے کے لیے ایک آخری موقع باقی ہے، ویتنامی قانون کے مطابق اگر وہ خرد برد کی گئی رقم کا 75 فیصد واپس کر دیں تو ان کی سزا کو عمر قید میں تبدیل کیا جاسکتا ہے۔
یوں ٹرونگ می لان خرد برد کیے گئے 12 ارب ڈالر کی رقم میں سے 9 ارب ڈالر واپس لوٹا کر سزائے موت کو عمر قید میں تبدیل کرواسکتی ہیں اور ساتھ ہی وہ ویتنام کے صدر سے معافی کی درخواست بھی کر سکتی ہیں۔
مزید خبریں :
