کراچی … کراچی میں طارق روڈ سے اغواء ہونیوالے تاجر کو لیاری سے مقابلے کے بعد بازیاب کرالیا گیا جبکہ اورنگی ٹاوٴن میں غیر ملکی امداد سے چلنے والے ایک اسپتال کے عملے کے دو ارکان کو اغوا کرلیا گیا۔سی پی ایل سی چیف احمد چنائے کے مطابق یوسف نامی تاجر کو 2 روز قبل طارق روڈ سے اغواء کیا گیا تھا۔ بات چیت کے بعد آج صبح تاوان کی ادائیگی کیلئے ملزمان نے لیاری کے قریب بلوایا تھا جہاں پہلے سے تیار پولیس اور ملزمان میں مقابلے کے باعث 3 ملزمان زخمی حالت میں فرار ہوگئے جبکہ ان کے ایک ساتھی کو گرفتار کرلیا گیا ہے۔ سی پی ایل سی ذرائع کے مطابق مغوی کو گاڑی سمیت باحفاظت بازیاب کرالیا گیا۔ اورنگی ٹاوٴن سیکٹر 16 میں واقع کورین اسپتال کے عملے کے ارکان اسپتال وین میں آرہے تھے کہ 3 کار سوار ملزمان اسلحے کے زور پر اسپتال کے ملازم سائمنڈ اور جاوید کو اغوا کرکے لے گئے۔ پاکستان بازار پولیس کے مطابق ملزمان اور مغویوں کو تلاش کیا جارہا ہے،اس علاقے سے پہلے بھی متعدد ڈاکٹر اغوا برائے تاوان کی وارداتوں کا نشانہ بن چکے ہیں۔