ممبئی … ورلڈ سیریز ہاکی میں ممبئی میرنز نے بھوپال بادشاز کو ایک صفر سے ہرادیا، دوسرے میچ میں دہلی وزرڈز نے کرناٹکا لائنز کو دلچسپ مقابلے کے بعد تین دو کے اسکور سے مات دے دی ۔ ممبئی میں میزبان ٹیم اور بھوپال بادشاز کے درمیان میچ کا پہلا کوارٹر بغیر کسی گول کے ختم ہوا، دوسرے کوارٹر کے چھٹے منٹ میں ممبئی میرنز نے خوبصورت گول کرکے برتری حاصل کرلی، بھوپال بادشاز نے میچ برابر کرنے کی بہت کوشش کی لیکن کامیاب نہ ہو سکی اور میچ ممبئی میرینز نے ایک صفر سے جیت لیا۔ اس سے پہلے کھیلے گئے میچ میں دہلی وزرڈز نے کرناٹکالائنز کو تین دو سے ہرا دیا۔ میچ کے تیسرے ہی منٹ میں دہلی وزرڈ نے پنالٹی کارنر پر برتری حاصل کر لی، دوسرے کوارٹر میں شکیل عباسی نے عمدہ گول کرکے اسکور دو صفر کردیا ، تیسرے کوارٹر میں کرناٹکا لائنز نے پہلا گول بنایا لیکن دہلی کی ٹیم نے تیسرا گول داغ کر برتری کو مستحکم کرلیا۔ میچ کے آخری لمحات میں کرناٹکا لائنز نے دوسرا گول کیا لیکن میچ تین دو کے اسکور سے دہلی وزرڈز کے نام رہا ۔