اسلام آباد…اسلام آباد ، کشمیر ، لاہور اور پشاور سمیت پنجاب اور خیبر پختون خوا میں آج درمیانی شدت کا زلزلہ آیا۔ بعض علاقوں میں کچے مکانات کی چھتیں اور دیواریں گر گئیں۔ افغانستان اور بھارت میں بھی زلزلے کے جھٹکے محسوس کئے گئے۔محکمہ موسمیات کے زلزلہ پیما مرکز کے مطابق زلزلے کے جھٹکے دوپہر 2 بجکر 25 منٹ پر آئے جو 25 سے 30 سیکنڈ تک جاری رہے۔ زلزلے کا مرکز افغانستان کے شہر جلال آباد کے قریب 70 کلومیٹر کی گہرائی میں تھا۔زلزلہ پیما مرکز کے مطابق زلزلے کی شدت 6.2 رکارڈ کی گئی تاہم امریکی جیولوجیکل سروے نے شدت 5.7 بتائی ہے۔ دارالحکومت اسلام آباد میں زلزلے سے عمارتیں لرز گئیں اور خوف و ہراس پھیل گیا۔پشاورسمیت پورے خیبر پختون خوا اور قبائلی علاقوں مہمند ، باجوڑ ، کرم اور خیبر ایجنسی میں زلزلے کے جھٹکے محسوس کئے گئے۔ پنجاب کے جن علاقوں میں زلزلہ آیا ان میں لاہور ، مری ، سرگودھا ، سیال کوٹ ، جھنگ ، گجرانوالہ ، فیصل آباد اور کئی دوسرے علاقے شامل ہیں۔ زلزلے سے کئی علاقوں میں کچے مکانات کی چھتیں اوردیواریں گرنے کی اطلاعات ملی ہیں۔ زلزلے کے جھٹکے محسوس کرتے ہی لوگ کلمہء طیبہ اور قرانی آیات کا ورد کرتے ہوئے گھروں اور دفاتر سے باہر نکل آئے۔مظفر آباد سمیت آزاد اور مقبوضہ کشمیر کے بیشتر علاقوں میں بھی زلزلہ آیا۔ افغانستان کے دارالحکومت کابل اور بھارت کے دارالحکومت نئی دہلی سمیت دونوں ملکوں کے کئی علاقوں میں زلزلے کے جھٹکے محسوس کئے گئے۔