لندن…کراچی میں ایم کیوایم کے رکن سندھ اسمبلی ساجدقریشی ، انکے جواں سال صاحبزادے وقاص قریشی اوردیگرکارکنوں کے بہیمانہ قتل کے خلاف جاری احتجاج کے سلسلے میں آج ایم کیوایم یوکے کے زیراہتمام لندن میں برطانوی وزیراعظم کی سر کاری رہائش گاہ 10ڈاوٴننگ پر ایک بڑااحتجاجی مظاہرہ کیاگیا۔مظاہرے میں بڑی تعدادمیں ایم کیوایم یوکے کے کارکنوں،عہدیداروں اور ہمدرد پاکستانی نوجوانوں ، بزرگوں خواتین اوربچوں کی بڑی تعدادنے شرکت کی ۔احتجاجی مظاہرے میں پاکستان سے آنے والی ایم کیوایم کی سینیٹرمحترمہ نسرین جلیل، رابطہ کمیٹی کے ارکان طارق جاوید،مصطفےٰ عزیزآبادی،ایم کیوایم یوکے کے آرگنائزرڈاکٹرسلیم دانش،جوائنٹ آرگنائزرفیض احمداوریوکے کی آرگنائزنگ کمیٹی کے ارکان بھی شریک تھے ۔مظاہرین نے اپنے ہاتھوں میں ایم کیوایم اورپاکستان کے پرچم اور الطاف حسین کے پورٹریٹ کے علاوہ شہیدرکن سندھ اسمبلی ساجدقریشی ، وقاص قریشی شہیداور دیگرشہیدوں کی تصاویراٹھائی ہوئی تھیں۔انہوں نے مختلف پلے کارڈز بھی اٹھارکھے تھے جن پر ایم کیوایم کے کارکنوں کے قتل،گرفتاریوں، تشدد، دہشت گردی ،مذہبی انتہاپسندی اورطالبان کے خلاف مذمتی کلمات درج تھے۔مظاہرین کراچی میں ایم کیوایم کے خلاف ہونے والی دہشت گردی اورمظالم کے خلاف مسلسل نعرے بازی کرتے رہے۔ اس موقع پر خطاب کرتے ہوئے محترمہ نسرین جلیل نے کہاکہ پاکستان میں ایم کیوایم کے رہنماوٴں، منتخب نمائندوں اورکارکنوں کاتسلسل کے ساتھ بہیمانہ قتل کیا جارہاہے،دہشت گرد آزادی کے ساتھ دندناتے پھررہے ہیں لیکن انہیں گرفتارکرنے والا کوئی نہیں ہے اورعوام خودکو غیرمحفوظ سمجھ رہے ہیں، اگریہ سلسلہ یونہی چلتارہا توعوام کے جذبات کوقابومیں رکھنامشکل ہوجائے گا،بین الاقوامی برادری پاکستان میں ظلم کے خلاف آوازبلندکرے اور دہشت گردی کے خاتمہ کیلئے اپنااثررسوخ استعمال کرے ۔ مصطفےٰ عزیزآبادی نے کہاکہ ساجدقریشی ایم کیوایم کے تیسرے رکن سندھ اسمبلی ہیں جنہیں دہشت گردوں نے بیدردی سے شہیدکیاہے اورکالعدم تنظیموں کے دہشت گرد وں نے میڈیاکے ذریعے قتل کی ذمہ داری بھی قبول کی،ان دہشت گردوں کے ٹھکانے بھی سب کومعلوم ہیں لیکن پولیس اورقانون نافذ کرنے والے اداروں کی جانب سے ان دہشت گردوں کے خلاف کوئی کارروائی نہیں کی جارہی ہے ۔اس کے بجائے ایم کیوایم کے بے گناہ کارکنوں کوہی گرفتارکرکے سرکاری حراست میں وحشیانہ تشددکانشانہ بنایا جارہاہے، جس سے صاف ظاہرہوتاہے کہ پاکستان میں ایم کیوایم کے خلاف ایک غیراعلانیہ ریاستی آپریشن کیاجارہاہے ۔ رکن رابطہ کمیٹی طارق جاوید نے کہاکہ پاکستان میں مہاجروں کی نسل کشی ہورہی ہے۔انہوں نے انسانی حقوق کی تنظیموں سے بھی اپیل کہ ایم کیوایم کے خلاف ہونے والے تشدد اورانسانی حقوق کی خلاف ورذیوں کے خلاف آوازبلندکرے۔ بعدازاں سینیٹرنسرین جلیل، طارق جاوید، مصطفےٰ عزیزآبادی، ڈاکٹرسلیم دانش اوردیگرنے 10ڈاوٴننگ جاکر برطانوی وزیراعظم ڈیوڈکیمرون کے نام ایک پٹیشن بھی پیش کی،جس میں مظالم کوبند کروانے کی اپیل کی گئی ہے۔