کراچی … کراچی کے علاقے گرومندر کے قریب بم دھماکے میں صدر زرداری کے چیف سیکیورٹی آفیسر بلال شیخ سمیت 3 افراد جاں بحق جبکہ 12 زخمی ہوگئے۔ پولیس کے مطابق گرومندر کے قریب نیوٹاوٴن مسجد کے سامنے خود کش حملہ آور میں بلال شیخ کی گاڑی کو نشانہ بنایا جس کے نتیجے میں صدر کے چیف سیکیورٹی آفیسر بلال شیخ سمیت 3 افراد جاں بحق اور 12 زخمی ہوگئے۔ پولیس سرجن نے ہلاکتوں کی تصدیق کرتے ہوئے بتایا ہے کہ زخمیوں میں سے متعدد افراد کی حالت تشویشناک ہے۔ نمائندہ جیو نیوز طلحہ ہاشمی کے مطابق پولیس کا کہنا ہے کہ بلال شیخ گاڑی کے جس جانب بیٹھے تھے اسی جانب دھماکا کیا گیا۔ دھماکے میں 6 پولیس اہلکار اور ایک ایف آئی اے اہلکار بھی زخمی ہوئے ہیں۔ ابتدائی تحقیقات کے مطابق دھماکے میں 4 کلو بارودی مواد اور بال بیرنگز استعمال کئے گئے تھے، دھماکے کے قریب سے انسانی اعضاء بھی ملے ہیں، خود کش حملہ آور نے بلال شیخ کی گاڑی کا پیچھا کیا اور گرومندر کے قریب ان کی گاڑی کے ساتھ بم دھماکا کردیا۔ صدر آصف علی زرداری نے کراچی میں بلال شیخ سمیت 3 افراد کے جاں بحق ہونے پر اظہار افسوس کیا ہے۔