ڈی آئی خان… ڈیرہ اسماعیل خان کی سینٹرل جیل پر ٹی ٹی پی کے 150 دہشت گردوں نے بھاری اسلحہ سے حملہ کردیا، جس کے نتیجے میں 5پولیس اہلکاروں سمیت 9 افراد جاں بحق اور 14زخمی ہوگئے، حملے میں 4قیدی اور 5خودکش حملہ آور بھی ہلاک ہوئے۔ پولیس کے مطابق حملے کے دوران 3خودکش حملہ آوروں نے خود کو دھماکے سے اڑا لیا، جبکہ 2 خودکش حملہ آورعلاقہ دین پورمیں سیکیورٹی فورسزکانشانہ بنے۔ پولیس کے مطابق جیل سے 2 خودکش حملہ آوروں کی لاشوں کے علاوہ 200 کلوگرام بارودی مواد برآمد ہوا ہے جسے ناکارہ بنایا جا رہا ہے، جبکہ جیل دفاترکے قر یب بھی بارودی موادموجودہے۔ سینٹرل جیل پر دہشت گرد حملے کے بعد ڈی آئی خان میں کرفیو نافذ کردیا گیا جبکہ وائرلیس سروس معطل کردی گئی۔ ڈپٹی کمشنر ٹانک کے مطابق حملے کے بعد ضلع ٹانک میں بھی کرفیو نافذ کردیا گیا ہے۔ ذرائع کے مطابق حملہ آور مختلف سمتوں سے گاڑیوں پرآئے اور حملہ آوروں کی ایک گاڑی اب بھی جیل میں موجودہے، تاہم حملے میں ہونے والے نقصان کاجائزہ لیاجارہاہے۔ سینٹرل جیل پر دہشت گردوں کے حملے کے بعد فائرنگ کا تبالہ رک گیا ہے، سیکیورٹی فورسز اور ایمبولینسیں جیل میں داخل ہوگئی ہیں، دہشت گردوں کے حملے میں 60 دھماکے سنے گئے، جبکہ حملے میں 300قیدیوں کے فرار ہونے کا خدشہ ہے، حملے کے بعد فوج نے سینٹرل جیل کا محاصرہ کرلیا ہے۔ ذرائع کے مطابق ڈی آئی خان کی سینٹرل جیل صوبے کی تیسری بڑی جیل ہے جس میں 5000قیدی موجود ہیں جن میں سے 250 قیدیوں کا تعلق کالعدم تنظیموں سے ہے۔ کالعدم تحریک طالبان نے سینٹرل جیل پر حملے کی ذمہ داری قبول کرلی ہے۔